كتير من الناس لما يسمعوا كلمة علامة تجارية أو براند أول حاجة تيجي في بالهم هي اللوجو أو الاسم وده طبيعي لأن دي أكتر حاجة بتكون ظاهرة قدامنا لكن الحقيقة إن بناء العلامة التجارية هو حاجة أوسع وأعمق بكتير من مجرد شعار أو اسم لامع.
1. ما هو مفهوم بناء العلامة التجارية؟
الموضوع مش مجرد تصميم لوجو أو اختيار ألوان ده شغل أعمق يتدخل في كل تفصيلة لها علاقة بالمشروع من طريقة الكلام مع الجمهور لنوع الصور المستخدمة لنبرة المحتوى لأسلوب التعامل مع العملاء وحتى الانطباع اللي بيسيبه المنتج أو الخدمة بعد التجربة.
العلامة التجارية القوية هي اللي بتبني علاقة طويلة المدى مع العميل بتخليه يحس إنه مش بيتعامل مع منتج وخلاص لكن مع كيان له شخصية وله رسالة واضحة، وده هو المفتاح الحقيقي لأي مشروع ناجح في السوق اليوم.
الفرق بين البراندنج والشعار
ناس كتير بتتلخبط ما بين البراندنج والشعار وده طبيعي لأن الشعار هو أول حاجة بتظهر للناس بس خلينا نوضحها ببساطة
- الشعار (اللوجو): هو مجرد عنصر بصري زي رمز أو تصميم يمثل الشركة هو الوجه الخارجي اللي بنشوفه على المنتجات أو الإعلانات.
- البراندنج (بناء العلامة التجارية) : هو الانطباع اللي بياخده الناس عنك الإحساس اللي بيحسوه لما يسمعوا اسم شركتك والقيمة اللي بترتبط بعلامتك في عقل العميل.
2.الهوية التجارية مش رفاهية دي الأساس!
في عالم مليان منافسين أول انطباع عنك هو اللي بيفرق واللي بيحدد الناس هتفتكرك ولا هتنساك بعد أول مقابلة هنا بتيجي أهمية “الهوية التجارية” مش مجرد لوجو وألوان وخط لأ ده الموضوع أعمق من كده بكتير.
هي الشكل اللي بيشوفك بيه الجمهور وهي الطريقة اللي بتتكلم بيها وبتحس بيها وتدخل بيها عقول الناس وقلوبهم من أوسع باب بتبدأ من التصميمات وبتوصل أسلوب الكلام وحتى الإحساس اللي بتسيبه في عقل الزبون بعد ما يتعامل معاك.
طيب إيه اللي بيكوّن الهوية دي؟
- الشعار: هو العلامة اللي بتترسخ في الذهن زي ضحكة مميزة لشخص دايمًا بتفتكره بيها
- الألوان: كل لون ليه دلالة نفسية وبيخلق مشاعر معينة فاختيارها مش عشوائي خالص
- الخطوط: آه، حتى الخطوط بتأثر لأن في خطوط بتوحي بالاحتراف وفي خطوط تدي إحساس بالعصرية أو البساطة
- النغمة أو الصوت: هل البراند بتاعك بيتكلم بأسلوب شبابي رسمي ساخر دي تفاصيل بتصنع فرق كبير
- التجربة البصرية الكاملة: من طريقة عرض المنتجات لتصميم البوستات وحتى شكل الموقع كله لازم يخدم نفس الإحساس
3. كيف تبني علامة تجارية تفضلها الناس وتتذكرها بسهولة؟
العلامة التجارية مش مجرد اسم ولا لوجو شكله حلو هي الانطباع اللي بيسيبه مشروعك في ذهن الناس علشان كده، بناء علامة تجارية قوية محتاج شغل دقيق وذكي من أول لحظة هنا خطوات لو مشيت عليها هتقدر تخلق هوية تعيش في ذاكرة جمهورك وتسيب بصمة صعب تتنسى.
اعرف مين اللي بتكلمه قبل ما تبدأ
أول خطوة وأهم خطوة لازم تكون فاهم بالظبط انت بتكلم مين جمهورك مش كل الناس ومش لازم ترضي الكل
اسأل نفسك مين الشخص اللي محتاج المنتج أو الخدمة اللي بقدمها؟ إيه اهتماماتهم؟ بيتكلموا إزاي؟ بيدوروا على إيه؟ لما تفهم تفاصيل جمهورك هتعرف تبني علامة تجارية بتكلمهم بلغتهم وتحل مشاكلهم.
اختار اسم له شخصية ومش بيتنسى
الاسم هو أول باب بيخبط عليه عميلك فلازم يكون سهل النطق مميز وله نغمة بتتشاف وتتفهم من أول مرة حاول تختار اسم يعكس روح البراند بتاعك ويكون فيه لمسة من الفكرة اللي بتقدمها. الاسم القوي مش شرط يكون معقد، بالعكس، البساطة ساعات بتكسب.
طب تختار اسم يعبر عنك إزاي؟
ابدأ من جوهر المشروع نفسه اسأل نفسك إيه القيمة اللي بقدمها؟ لو البراند بتاعي كان شخص كان هيكون مين؟ جربتركب كلمات أو تستخدم تعبيرات محلية مرتبطة بالسوق اللي داخل فيه وابعد عن التقليد لإن الاسم التقليدي بيموت في الزحمة.
أدوات ممكن تساعدك تختار الاسم
في أدوات أونلاين ممكن تسهّل عليك الموضوع زي:
- Namelix: بيقترح أسماء ذكية بناءً على الكلمات المفتاحية اللي تدخلها
- Shopify Name Generator: بسيط وسريع بيطلعلك اقتراحات متاحة للدومين كمان
- Wordoid: لو عايز اسم مبتكر ومختلف ومع الأدوات دي جرب تسأل دايرة معارفك أو حتى جمهورك في استبيان صغير رأي الناس بيفرق!
صمّم هوية بصرية تليق بشخصية البراند
الهوية البصرية مش بس الشعار دي اللغة اللي بيتكلم بيها شكلك مع الناس الألوان الخطوط الصور والطريقة اللي بتعرض بيها نفسك، لازم كل تفصيلة تعكس الشخصية اللي عايز الناس تحس بيها لما يشوفوك والاتساق في كل حاجة بيخلي الناس تفتكرك حتى من غير ما يشوفوا اسمك.
صياغة الرؤية والرسالة مش رفاهية
أي علامة تجارية لازم يكون وراها هدف ورسالة واضحة الناس بتحب البراندات اللي ليها قصة احكي ليه بدأت وعايز توصل لفين الرسالة مش لازم تكون طويلة لكن لازم تبقى صادقة وملهمه وتقدر تشرحها في جملة واحدة لو حد سألك انتوا مين ؟
خلي صوتك وشكلك واحد في كل مكان
الناس بتحب البراند اللي شخصيته واضحة يعني لما يشوفوك على إنستجرام ويقروا عنك في موقعك ويسمعوا عنك في إعلانيحسوا إنهم بيكلموا نفس الكيان خلي أسلوب الكتابة الألوان طريقة التواصل كلها بتعكس نفس النغمة نفس القيمة ونفس الروح التناسق ده هو اللي بيخلق الثقة والثقة هي اللي بتخلي الناس ترجعلك تاني.
4.ازاي تبني اسمك في السوق وتخلي الناس تعرفك وتثق فيك؟
في فرق كبير بين إنك تبيع منتج بشكل مباشر وإنك تبني اسم له قيمة الناس تفتكره وتفضله حتى لو كان في بدائل أرخص التسويق المباشر هدفه الأساسي البيع السريع لكن تسويق العلامة التجارية هو استثمار طويل المدى في مكانتك وسمعتك في السوق.
لما تركز على البراند بتاعك أنت مش بس بتبيع منتج أنت بتبني علاقة بتخلق إحساس وبتحفر مكان في عقل وقلب الجمهورالناس بتحب تتعامل مع كيانات عندها قصة وهوية.
أدوات فعّالة توصل بيها صوت علامتك لجمهورك:
- المنصات الاجتماعية (السوشيال ميديا):هي أقوى ساحة النهاردة تتكلم فيها عن نفسك مش بس تعرض منتجاتك استخدمها تحكي قصص تشارك لحظات وتفتح نقاشات الناس مش بتتفاعل مع بوست فيه عرض وخلاص، لكن ممكن تبني مجتمع صغير حواليك لو كنت قريب منهم وبتتكلم بطريقتهم.
- المحتوى اللي ليه معنى:المحتوى مش إعلان هو فرصة تثبت بيها إنك فاهم اللي بيمر بيه عميلك وبتقدمله قيمة من غير ما تطلب منه يشتري ممكن يكون فيديو تدوينة بودكاست أو حتى تعليق ذكي المهم تكون بتقدم حاجة تستحق تتشاف.
- التعاون مع المؤثرين والشراكات الذكية:اختار ناس صوتهم مسموع في مجالك بس مش شرط يكونوا مشاهير أحيانًا واحد عنده ألف متابع بس الناس بتصدقه أكتر من مليونير بيعلن عن كل حاجة الشراكات كمان مع براندات تكمّلك مش تكررك بتديك مصداقية وتفتحلك أبواب جديدة من الجمهور اللي لسه ما يعرفكش.
5.أخطاء قاتلة ممكن تدمّر البراند من غير ما تحس — وإزاي تتفاداها
في عالم البراندات التفاصيل الصغيرة أحيانًا بتكون هي السبب الرئيسي في فشل مشروع كان ممكن يبقى قصة نجاح من أبرز الغلطات اللي بيقع فيها أصحاب العلامات التجارية إنهم بيغيروا شكل الهوية البصرية كل شوية مرة اللوجو أزرق ومرة أحمر ومرة الخط كلاسيكي ومرة عشوائي والنتيجة؟
العميل بيتوه ومش بيقدر يربط بين الشكل والاسم وده بيقلل من الثقة والانطباع العام كمان من الأخطاء الشائعة إنك تفتقد للتناسق، سواء في المحتوى أو الألوان أو أسلوب الكلام اللي بتستخدمه على منصات مختلفة كل ما كنت ثابت في طريقة تواصلك كل ما البراند بتاعك ترسّخ في ذهن الناس أسرع.
وبرضو فيه نقطة كتير بيغفلوا عنها وهي إنهم مش بيهتموا يفهموا السوق كويس قبل ما يبدؤوا يعني ممكن تكون بتتكلم بلغة مش لغة جمهورك أو بتقدم حاجة هما مش محتاجينها أساسًا وده مع الوقت بيخلي البراند يظهر وكأنه منفصل عن الواقع.
عشان كده أهم خطوة في بناء علامة تجارية قوية هي إنك تشتغل على رؤية واضحة وهوية ثابتة وتكون دايمًا قريب من جمهورك بتتكلم لغتهم وبتحل مشاكلهم مش بس بتبيع منتج.
6.علامات تجارية كسرت القواعد ونجحت
لو بصينا حوالينا هنلاقي إن في براندات كتير قدرت تثبت نفسها مش بس علشان شكلها حلو أو اسمها مميز لكن علشان قدرت تبني علاقة حقيقية مع الناس شركة مثل نون قدرت في وقت قياسي تكون من أشهر منصات البيع في العالم العربي مش بس عن طريق الإعلانات لكن من خلال هوية بصرية ملفتة وأسلوب بسيط قريب من الناس وكمان عروض ذكية بتستهدف احتياجاتهم اليومية.
ولو طلعنا برا الوطن العربي هنلاقي Nike مثال عالمي عبقري.الشركة دي مش بس بتبيع أحذية رياضية هي بتبيع فكرة التحدي والتفوق على النفس وشعارهم Just Do It بقى رمز لأي حد عايز يغير حياته وده حصل لأنهم عرفوا يربطوا بين الرسالة والقيمة اللي الجمهور بيؤمن بيها.
الدرس هنا؟ البراند مش بس شكل ولوجو هو وعد بتقدمه للناس ولو وفيت بيه بذكاء وصدق هتتحول من مجرد اسم إلى قصة بتتلّف حوالينها مشاعر وانتماء وولاء.
7. ختامًا: خطوات ذكية تخلي علامتك التجارية تكبر مع الوقت
لو عندك حلم تبني علامة تجارية قوية وتفضل عايشة في السوق لسنين محتاج تفهم إن الموضوع مش مجرد لوجو أو اسم حلو الموضوع أكبر من كده بكتير نجاح البراند الحقيقي بييجي من شغل طويل النفس فيه استمرارية وتطوير وإنك تفضل دايمًا قريب من الناس اللي بتكلمهم خليني أقولك 3 عناصر أساسيين لازم تركز عليهم لو عايز تبني اسم يفضل دايمًا في الصورة:
- الاستمرارية مش رفاهية دي أساس اللعبة لو كل شوية تغيّر في طريقتك أو صوت البراند يطلع بشكل مختلف كل مرة الناس هتتلخبط الثبات في الرسالة الألوان وطريقة التواصل بيخلوا الجمهور يفتكرك بسهولة ويثق فيك مع الوقت وده مش معناه الجمود لكن يعني إنك تبني هوية ثابتة واضحة مهما كان التغيير حوالينك.
- التطوير المستمر هو وقود النجاح الأسواق بتتغير، والعملاء توقعاتهم بتتغير، والتكنولوجيا بتجري، فلو فضلت واقف مكانك هتتفاجئ إنك بقيت في آخر الصف عشان كده، لازم تبص دايمًا قدّام وتطوّر من نفسك من خدماتك ومن طريقة تواصلك اسأل نفسك دايمًا: إزاي أقدر أضيف قيمة أكتر للناس اللي بتعامل معاهم؟
- أسمع كويس الناس بتقول كتير لو ركزت معاهم أوقات كتير بنفتكر إننا عارفين كل حاجة عن جمهورنا بس الحقيقة إنك محتاج تسمعهم راقب تعليقاتهم ردود أفعالهم وحتى سكوتهم كل دا فيه رسائل ولما تبدأ تتجاوب مع اللي بيقولوه هتحس إنك بتبني علاقة حقيقية مش مجرد علاقة بيع وشراء.
لا تعليق